النور بيحكي (ورشة إضاءة)

ورشة سابقة — انتهى التسجيل.

عمرك شوفت نفس الشخص في مشهدين، وحسيت إن واحد منهم مريح والتاني غامض أو مخيف، رغم إن مفيش حاجة اتغيرت غير النور؟

في الورشة دي مش هنتكلم عن كاميرات، ولا عدسات، ولا زوايا تصوير. هنلعب بالنور نفسه.

هنتعلم بالتجربة:

• إزاي اتجاه الضوء يغيّر إحساس المشهد.
• الفرق بين الـ Hard Light والـ Soft Light.
• ليه الضوء الدافي بيدي إحساس مختلف عن البارد.
• إزاي الألوان تغيّر معنى المشهد.
• إزاي تعمل Mood كامل باستخدام الإضاءة فقط.

ومش هنقعد نتفرج على سلايدات وخلاص؛ هتشتغل بإيدك على مصادر إضاءة حقيقية، وتجرب، وتغيّر، وتشوف النتيجة قدامك فورًا.

وفي آخر الورشة هتعمل بنفسك مشهد أو Reel قصير، وتحاول توصل إحساس معين باستخدام الإضاءة فقط. مفيش صح وغلط؛ في سؤال واحد: النور اللي عملته… خلاني أحس بإيه؟

مين المفروض يحضر؟ أي حد حابب يعمل ريلز على أي منصة، أصحاب الأعمال والمشاريع الصغيرة اللي عايزين يسوّقوا لنفسهم، وأي حد شغوف بعالم الميديا والمحتوى.

المطلوب منك: هات معاك شغفك، موبايلك شحنه كامل، أو الكاميرا بتاعتك.

الحضور مجاني تمامًا، لكن الأماكن محدودة جدًا. كان الحضور يتطلب مكالمة تأكيد من فريقنا قبل الموعد.

تعال شاركنا أفكارك، وخلينا نبني مجتمعنا مع بعض.

الموعد والمكان

الخميس ٢٤ سبتمبر ٢٠٢٦، من ٥ إلى ٨ مساءً تقريبًا — بتوقيت القاهرة. الحضور قبل الموعد بـ١٥ دقيقة.

مقر مزج — دمياط، الشعراء، بجوار موبيليات الخولي.